Gəncədən səfər etmək istəyən sərnişinlərin avtovağzalda ödənişlə bağlı problem yaşadığı iddia olunur.
Gencexeber.az-a daxil olan çoxsaylı şikayətlərə görə, Gəncə Beynəlxalq Avtovağzal Kompleksində bilet almaq istəyən sərnişinlərə kartla ödəniş edə bilməyəcəkləri bildirilib və yalnız nağd pul tələb olunub.
Şikayətçilərdən birinin sözlərinə görə, kassada kartla ödəniş etmək istədikdə POS-terminalın işləmədiyi deyilib. Daha sonra isə ondan kartdan-karta köçürmə etməsi tələb olunub.
"Kartla ödəmək istəyirsən, deyirlər POS-terminal işləmir. Kassaya gedirsən, deyirlər kartla ödəniş yoxdur. Nağd pulun yoxdursa, yola çıxa bilmirsən", – vətəndaş narazılığını bildirib.
Sərnişinlər avtovağzalda nağdsız ödəniş imkanının niyə təmin edilmədiyinin araşdırılmasını və məsələyə aidiyyəti qurumların münasibət bildirməsini xahiş edirlər.
Məsələ ilə bağlı Gencexeber.az tərəfindən Azərbaycan Yerüstü Nəqliyyat Agentliyinə sorğu ünvanlanıb.
