Gəncədə fəaliyyət göstərən 8 nömrəli marşrut xətti üzrə hərəkət edən avtobuslarla bağlı sərnişinlər narazılıqlarını dilə gətirirlər.
Gencexeber.az-a müraciət edən vətəndaşların sözlərinə görə, isti hava şəraitinə baxmayaraq, marşrut xəttində istismar olunan avtobusların əksəriyyətində kondisioner sistemləri işlədilmir. Sərnişinlər bildirirlər ki, gün ərzində temperaturun yüksək olduğu saatlarda avtobuslarda hərəkət etmək çətinləşir və bu da xüsusilə yaşlı insanlar, uşaqlar və sağlamlıq problemi olan şəxslər üçün əlavə narahatlıq yaradır.
Onların iddiasına görə, "Azər-Avtonəqliyyat" MMC-yə məxsus 8 nömrəli marşrut xəttində xidmət göstərən avtobuslarda kondisioner sistemləri qəsdən istifadəyə verilmir. Sərnişinlər hesab edirlər ki, bu vəziyyət ictimai nəqliyyatda xidmət keyfiyyətinə mənfi təsir göstərir.
Vətəndaşlar yay mövsümündə sərnişinlərin rahatlığının təmin olunması üçün avtobuslarda kondisionerlərin işlək vəziyyətə gətirilməsini və nəzarətin gücləndirilməsini istəyirlər.
Məsələ ilə bağlı redaksiyamız tərəfindən "Azər-Avtonəqliyyat" MMC ilə əlaqə saxlamaq cəhdləri nəticəsiz qalıb.
Xatırladaq ki, bir neçə gün əvvəl Gəncə şəhərində fəaliyyət göstərən 2 nömrəli marşrut xətti üzrə hərəkət edən avtobuslarda da analoji problemlə bağlı sərnişin şikayətləri səsləndirilmişdi. Həmin müraciətlərdə də kondisioner sistemlərinin işləmədiyi və bunun sərnişinlərin narazılığına səbəb olduğu bildirilirdi.
Qeyd edək ki, Gəncədə fəaliyyət göstərən və nağdsız ödəniş sistemi ilə təhciz edilən "BakuBus" MMC-yə, eləcə də 2 və 8 nömrəli marşrut xətlərinə məxsus avtobuslarda gedişhaqqı 60 qəpik təşkil edir.
