Gəncə Dövlət Universiteti (GDU) yanvar ayının tələbə təqaüdlərini ödəməyib.
Məsələ ilə bağlı GDU tələbələri Gencexeber.az-a müraciət ediblər.
Onlar qeyd edib ki, artıq fevral ayının bitməsinə qısa bir müddət qalsa da, hələ də yanvar ayının təqaüdləri köçürülməyib:
“Elə tələbələr var ki, ehtiyaclarını həmin təqaüdlə qarşılayırlar, o da gecikəndə çətin vəziyyətdə qalırlar. Digər ali təhsil ocaqları artıq fevral ayının təqaüdünü ödəməyə hazırlaşır. Ümid edirik ki, bizim də universitetdə nə vaxtsa təqaüdlər zamanında ödəniləcək. GDU rəhbərliyindən tələb edirik ki, haqqımız olan təqaüdü vaxtında ödəsinlər”.
Məsələ ilə bağlı açıqlama verən Gəncə Dövlət Universitetinin mətbuat katibi Günay Məmmədova bildirib ki, universitetdən asılı olmayan səbəbdən yanvar ayının təqaüdləri gecikib:
“Təqaüdlər universitet yox, Elm və Təhsil Nazirliyi tərəfindən qarşılandığı üçün gecikmə bizdən asılı deyil. Ancaq bir həftə ərzində köçürülmə prosesi baş tutacaq”.
