Azərbaycanın İrandakı səfirliyinə edilən hücumdan 2 il ötür.
Gencexeber.az məlumat verir ki, 27 yanvar 2023-cü il tarixində Bakı vaxtı ilə səhər saat 8:30 radələrində Azərbaycan Respublikasının İran İslam Respublikasındakı Səfirliyinə basqın həyata keçirilib. Nəticədə səfirliyin mühafizə xidmətinin rəisi Orxan Əsgərov həlak olub, digər əməkdaş Mahir İmanov isə yaralanıb. Səfirliyin mühafizə xidmətinin əməkdaşı Vasif Tağıyev əliyalın şəkildə həmin şəxsi zərərsizləşdirib.
İnsidenti törədən İran vətəndaşı Yasin Hüseynzadə həbsxanadadır. Onun barəsində ölkəsində edam cəzası çıxarılsa da, icra edilməyib.
Qeyd edək ki, Orxan Rizvan oğlu Əsgərov 1982-ci ilin 5 noyabr tarixində Gəncədə dünyaya gəlib. Baş leytenant O.Əsgərov Azərbaycan Respublikasının İran İslam Respublikasındakı Səfirliyinin Mühafizə Xidmətinin rəisi vəzifəsində çalışıb.
Hadisənin baş verdiyi gün şəhid elan edilən Orxan Əsgərov 3 fevral 2023-cü ildə Azərbaycan Respublikası Prezidentinin sərəncamı ilə ölümündən sonra “Vətən uğrunda” medalı ilə təltif edilib.
