Gencexeber.az-ın bugünkü müsahibi rəssam Davud Bayramovdur.
Müsahibəni təqdim edirik:
- Davud bəy, öncə özünüz haqqında məlumat verməyinizi istərdim.
- 1986-cı ilin dekabrın 2-də Gəncə şəhərində anadan olmuşam.
- Rəssam olmaq qərarını necə verdiniz və bu yolda ilk addımlarınızı necə atdınız?
- Uşaqlıqdan rəssamlığa böyük marağım olub. Kitablarda olan fotolara baxıb rəsm çəkirdim. Rəssam Füzuli müəllimin yanına rəsm işləri aparırdım və ondan məsləhətlər alırdım. Kitablardan mütaliə edib, öz üzərimdə çalışırdım. İnternet olandan sonra başladım onlayn dərs almağa.
- Ən çox hansı texnika və ya stilə üstünlük verirsiniz?
- Əsasən kətan üzərində yağlı boyadan istifadə edirəm. Klassik, realizm, hipperrealiz üsluba daha çox üstünlük verirəm.
- Əsərlərinizdə daha çox hansı mövzulara yer verirsiniz?
- Hər mövzuda işlər işləmişəm. Çoxu natürmort olub. Portret janrı mənə yaxındır. Hazırda portret janrına üstünlük verirəm.
- Bir əsər yaratma prosesi necə gedir? Əsərin yaradılmasına başlamazdan əvvəl hansı addımları atırsınız və bu prosesin hansı hissəsi sizə ən çox həyəcan verir?
- Bir işi işləmək üçün əvvəl beynimdə düşünürəm necə edim ki, maraqlı bir iş olsun. Kətana eskizi edib, boya ilə başlayıram mərhələ-mərhələ kətanı doldurmağa. Proses 4-5 mərhələdən keçir, 4-5 qat boya nazik, bir-birinin üzərinə qoyulur. Hər mərhələdən sonra 3 gün qurumalıdır. Bir portret 15-30 gün, bəzən daha çox ərzində işlənilir.
İşdən zövq alıram. Həyəcan hər dəqiqə olmur. Həyəcan işi bitirəndən sonra yaranır. Rəsmə baxıb, adam vahimələnir ki, bunu insan edib? Onda qərar verirəm ki, iş tamamlanib. İşə baxıb həyacanlanmadınsa, deməli hələ də işləmək lazımdır.
- Əsərlərinizdə başqa mədəniyyətlərin, tarixlərin və ya dövrlərin izləri varmı?
- Gəncəyə aid işlərim var. Cavad xan türbəsi, Şah Abbas məscidi, natürmortlarda Gəncə xalçası işləmişəm. Milli qablardan istifadə etmişəm.
- Bir rəssam olaraq sizi digər sənətkarlardan fərqləndirən cəhət nədir?
- İncə detallı işləməyim məni digər rəssamlardan fərqləndirir.
- Sizcə, rəssam olaraq ən çox qarşılaşılan çətinliklər hansılardır?
- Bir sıra kütlənin bayağı musiqiyə və rəsmə dəyər verməsi.
- Yaratdığınız əsərlərlə insanlara hansı duyğuları aşılamaq istəyirsiniz?
- İçimdən gələn hissləri və həqiqəti çalışıram gördüyüm kimi kətanda əks etdirim.
- Gələcəkdə hansı layihələr üzərində işləməyi planlaşdırırsınız?
- Daha da real portretlər üzərində işləyib, insanları təəcübləndirməyi planlaşdırıram.
- Sənətinizin gələcək inkişafını necə görürsünüz?
- Gələcək özümdən asılıdır, daha da inkişaf etmək və öz üzərimdə çalışmaq istəyirəm.
- Gəncəlilərin sənətə münasibətləri necədir?
- Gəncədə çox yaxşı sənətkarlar var. Yaxşı işə hər kəs dəyər verir.
- Tələbəniz varmı?
- Xeyr, yoxdur. Çox insanlar müraciət edir ki, dərs keçim, amma bu haqda düşünmürəm. Öz inkişafımın arxasınca gedirəm. Müəllim kimi işləsəm, özüm rəssam kimi irəli gedə bilməyəcəm.
- Nə qədər gəlir əldə edirsiniz?
- Sifarişin həcmindən asılı olaraq dəyişir.
- Sərginiz keçirilibmi?
- Fərdi sərgim olmayıb. Qrup sərgisi olub. “Gəncəsənət” sağ olsun, təşkil edib.
- Sizdən başqa rəssam olan ailə üzvü varmı?
- Ailədə tək rəssam mənəm.
Nəzrin Vahid
