Gəncədə bir neçə küçənin baxımsız vəziyyəti ilə bağlı şikayətlər səngimir.
Gencexeber.az məlumat verir ki, Gəncənin Şeyx Bəhaəddin və Əli bəy Hüseynzadə kimi mərkəzi küçələrinin vəziyyəti sakinlər üçün əsl problemə çevrilib. Gəncə çayının sol sahilində yerləşən bu ərazi uzun illərdir abadlaşdırılmayıb. Asfaltsız yollar yağışlı havada bataqlığa çevrilir.
Əvvəllər Muxtar Hacıyev küçəsi kimi tanınan Aida İmanquliyeva və Etibar Məhərrəmov küçələri də oxşar haldadır. Yağmurlu hava zamanı yollarda böyük gölməçələr əmələ gəlir ki, bu da avtomobil sürücülərini belə çətin hala salır.
“Krasnı selo” kimi tanınan ərazidə yerləşən Aşıq Ələsgər küçəsində isə su təchizatı və kanalizasiya sistemlərinin yenidən qurulması, eləcə də ərazinin işıqlandırılması zamanı mövcud asfalt örtüyü dağılıb. Sakinlərin sözlərinə görə, 4 şəhid ailəsinin yaşadığı küçədə uzun müddət keçməsinə baxmayaraq asfalt bərpa edilməyib.
Sadaladığımız ərazilərdə hazırki durum sadəcə narahatlıq deyil - söhbət nəqliyyat və piyadaların hərəkəti ilə bağlı ciddi problemlərdən gedir. Vətəndaşların adi gediş-gəlişi belə təhlükəli olub.
