Mahrasa bağında yerləşən çoxmənzilli binaların ətrafında sahibsiz itlərlə bağlı problem getdikcə pisləşir.
Gencexeber.az-a sakinlərdən daxil olan şikayətlərə əsasən, xeyli sayda sahibsiz it son vaxtlar aqressivləşib. Vətəndaşlar həmin yerdə dördayaqlıların toplanmalarını isə çox sayda düzülən zibil qutularının vaxtında oradan daşınmaması ilə əlaqələndirirlər.
Yerli sakinlər uşaq və qocalara qarşı artan təhlükədən ciddi narahat olduqlarını bildiriblər. “İtlərin hürməsindən dincimizi itirmişik” - sakin bildirib.
Bununla əlaqədar olaraq ərazi sakinləri aidiyyəti qurumları problemin aradan qaldırılması üçün tədbirlər görməyə, həmçinin tullantıların ərazidən tez-tez aparılmasını istəyirlər.
Xəbər verdiyimiz kimi, Gəncədə 2023-cü ildə yaradılmış “Yuva” sığınacağı ötən ayın əvvəlində kifayət qədər ianələrin olmadığı üçün fəaliyyətini dayandırıb. Həmçinin orada saxlanılan heyvanlar şəhər ərazisinə buraxılıb.
