Xəbər verdiyimiz kimi, Gəncədə binalardan birinin damından uzun müddət iri dəmir parçası asılı vəziyyətdə qalmışdı.
Gencexeber.az məlumat verir ki, sözügedən hal Heydər Əliyev prospektində yerləşən 159 nömrəli çoxmənzilli binada müşahidə edilib. Piyadaların həyatına ciddi təhlükə törədən bu dəmir parçası qeyd edilən ünvana cəlb edilən aidiyyəti qurumun əməkdaşları tərəfindən demontaj edilərək götürülüb.
Onu da vurğulamaq lazımdır ki, Gəncədə binaların və digər tikililərin fasadlarında qüsurlar yeni problem deyil. Şəhərdə, xüsusilə Heydər Əliyev və Nizami prospektlərində qırmızı kərpiclə üzlənən bir sıra təhlükəli tikililər var ki, bu da sakinlərin ciddi narahatlığına səbəb olur.
Qeyd edək ki, cari ilin oktyabr ayında Gəncədə kişi sayıqlığı sayəsində binalardan birinin damından düşən fasad qırıntılarından yayına bilib.
2022-ci ilin martın 19-da isə Nizami Gəncəvi prospektində güclü külək nəticəsində yolun kənarında dayanan ana və azyaşlı qızının üzərinə evin divarına çəkilmiş üz daşları tökülüb.
