“Kəpəz”in iki futbolçusu karyeralarını başa vurub. Bu haqda 23 yanvar tarixində Qol.az-a istinadən məlumat veririk.
Əfran İsmayılov bildirib ki, Rauf Əliyevlə birgə klubun İdarə Heyətinin sədri İlqar Nadiri ilə görüşüblər.
“Bəlkə də, qalıb oynamaq da olardı, amma xeyirlisi belə imiş. Əsas odur ki, başımız ucadır. Futbol çox çətin peşədir. Burada hər cür insan olur. Şükür ki, kişi kimi ayrıla bildik. Rauf əslində karyerasını bitirmək istəmirdi. Ancaq onun ayağı bərbad gündədir. Həkimlər oynamağı məsləhət bilmədilər. “Şamaxı”da çıxış etmək variantı var idi. Amma onların meydanı süni örtüklü idi, çətin olacaqdı. Ona görə də düşündü ki, ən yaxşısı karyerasını bitirməkdir.”
Əfran İsmayılov futboldan tamamilə getmədiyini qeyd edib. O, bildirib ki, məşqçi olmaq istəyir. B kateqoriyasını almaq üçün kursa yazılacaq. Eyni zamanda İsmayılov Azərbaycan Dövlət Bədən Tərbiyəsi və İdman Akademiyasının 2-ci kurs tələbəsidir.
Qeyd edək ki, həm Rauf, həm də Əfran “Qarabağ”ın yetirmələridir. Rauf Ağdam klubundan ayrıldıqdan sonra “Bakı”, “Xəzər Lənkəran”, “Neftçi”, “İnter”, “Kukesi” (Albaniya), “Qəbələ” və “Neftçi”də çıxış edib. Əfran isə “Qarabağ”dan başqa, “Turan Tovuz”, “Bakı”, “Xəzər Lənkəran”, “Keşlə”, “Sumqayıt” və “Səbail”də oynayıb. Hər iki futbolçunun 34 yaşı var.
