Nazir Gəncədə stadionun təmiri ilə bağlı məsələyə münasibət bildirib. Bu haqda 10 iyun tarixində Qafqazinfo-ya istinadən məlumat veririk.
Şəhərimizdə səfərdə olan Gənclər və İdman naziri Fərid Qayıbov “Kəpəz”in stadionu ilə bağlı açıqlama verib. O bildirib ki, bunun üçün ilk növbədə vəsait tələb olunur.
“Birincisi, stadionun təmir olunması üçün vəsait lazımdır. Hazırda bizdə o vəsait yoxdur. Biz heç vaxt deməmişik ki, oranı təmir edəcəyik. O məlumat mediaya kimlər tərəfindən gəlibsə, onu araşdıra bilərsiz. Stadion bizim balansımızdadır və biz başa düşürük ki, ora təmir olunmalıdır. Onun üzərində hazırda çalışırıq. Sizə bu dəqiqə konkret məlumat deyə bilməyəcəm. Amma onu deyə bilərəm ki, biz problemi bilirik, görürük və üzərində çalışırıq. Meydançalar yaxşıdır. Orada akademiya da yaradılıb. Akademiyanın meydançaları AFFA tərəfindən təmir olunub. Bir qalır tamaşaçılar üçün tribunalar”, - deyə nazir qeyd edib.
