Goranboylu vətəndaş oğurluğa görə saxlanılıb.
Qaynarinfo-nun verdiyi məlumata əsasən, hadisə Bakıda fəaliyyət göstərən "Nasha Events" dekor şirkətində baş verib. Burada qeyr-rəsmi şəkildə fəhlə işləyən 30 yaşlı Murad adlı şəxs müəssisədən külli miqdarda oğurluq edib.
Belə ki, şirkətin direktoru Nəzrin Abdullayeva giriş qapısının açarını 2009-cu ilin dekabr ayından Murada verib. Sonuncu isə 10 dekabr 2022-ci il tarixdən 4 avqust 2023-cü il tarixədək icarəyə götürdüyü avtomobillə oradan ümumi dəyəri 130 min manat olan avadanlıq oğurlayıb. Hətta Murad öz müdirinin "Axus" firmasına aid idman qaçış aparatını, masaüstü kompüterini, bir ədəd sarı rəngli kreslonunu da oradan götürüb.
Təqsirləndirilən şəxs şirkətə ümumilikdə 127 691 manat məbləğində ziyan vurub.
Nəzrin Abdullayeva onlara dəyən zərərin ümumilikdə 130 min manatdan çox olduğunu deyib. Murad isə oğurladığı avadanlıqları Sabunçu bazarında və elan saytlarında dəyər-dəyməzinə satdığını bildirib.
Məhkəmənin qərarı ilə təqsirləndirilən şəxs Cinayət Məcəlləsinin 179.4-cü maddəsi ilə təqsirli bilinərək barəsində 10 il müddətinə azadlıqdan məhrumetmə cəzasına məhkum edilib.
