Gəncə Ağır Cinayətlər Məhkəməsində qəsdən sağlamlığa ağır zərbə vurmada təqsirləndirilən Əlövsət İmanovun (soyadı şərtidir) cinayət işi üzrə məhkəmə istintaqı başa çatıb.
Pravda.аz xəbər verir ki, hakim Elşən Vəliyevin sədrliyi ilə keçirilən prosesdə hökm oxunub.
Məhkəmənin hökmü ilə o, 3 il 6 ay müddətinə azadlıqdan məhrum edilib.
İttihama görə, təqsirləndirilən şəxs ötən il Şəmkir rayonu, Təzəkənd kəndində əmisi oğlu, zərərçəkmiş Əbülfəz İmanovun (soyadı şərtidir) yaşadığı evin həyətində yerləşən yardımçı tikilidə olarkən şəxsi münasibətlər zəminində baş vermiş mübahisə nəticəsində ağır cinayət əməli törədib.
Hadisə zamanı Əlövsət sərxoş vəziyyətdə olub. Mübahisəyə səbəb isə zərərçəkmiş şəxsin onun Gəncə şəhərində yaşayan arvadı barədə irəli sürdüyü iddialar olub. Tərəflər arasında yaranmış mübahisə daha sonra fiziki qarşıdurmaya çevrilib.
İlkin olaraq Əbülfəz təqsirləndirilən şəxsi yumruqla çiyin və boyun nahiyəsindən vuraraq, həmçinin kəllə ilə dodaq nahiyəsinə zərbə endirərək ona xəsarət yetirib. Bundan sonra Əlövsət qisas alma niyyəti ilə hərəkət edərək qarşı tərəfə hücum edib, zərbələr endirib. Daha sonra isə soyuq silah hesab edilməyən, lakin kəsici və deşici xassəyə malik mətbəx bıçağı ilə Əbülfəzin bədəninin müxtəlif nahiyələrinə üç dəfə zərbə vurub. Nəticədə zərərçəkmiş şəxs ağır və həyat üçün təhlükəli xəsarətlər alıb.
Beləliklə, təqsirləndirilən şəxsin əməli qisas motivi ilə törədilmiş qəsdən sağlamlığa ağır zərər vurma cinayəti kimi xarakterizə olunub.
