Xəbər verdiyimiz kimi, Azərbaycan və Avropa Yenidənqurma və İnkişaf Bankı (EBRD) arasında “Gəncə şəhərinin su təchizatı və kanalizasiya sisteminin yenidən qurulması üçün kredit Sazişi” imzalanıb. Kredit sazişi”ni İqtisadiyyat naziri Mikayıl Cabbarov və Bankın birinci vitse-prezidenti Yurqen Riqterink imzalayıblar.
Hansı işlər görüləcək?
Layihəyə əsasən Gəncə şəhərində 855 kilometr içməli, 813 kilometr tullantı su şəbəkəsinin yaradılması nəzərdə tutulur. Həmçinin Gəncə şəhərində yaranacaq tullantı sularının təmizlənib zərərsizləşdirilməsi üçün gələcəkdə Samux rayonu ərazisində məhsuldarlığı sutkada 110 min kubmetr olacaq təmizləyici qurğunun inşası da layihəyə daxildir.
Eyni zamanda Gəncə Üçüncü MDB Oyunlarına ev sahibliyi etməyə hazırlaşır
Böyüyüb inkişaf edən Gəncə həm də beynəlxalq tədbirlərin keçirildiyi bir mərkəzə çevrilib. Tək bir faktı deyək ki, bu ilin oktyabrında Gəncə mötəbər bir tədbirə ev sahibliyi edəcək. Söhbət Üçüncü MDB Oyunlarından gedir. Beləcə, yaxın aylarda Gəncə şəhəri MDB Oyunlarının mərkəzi olacaq.
Bu məqsədlə Gəncədə yeni stadion inşa edilir. Sözügedən stadionun təməlqoyma mərasimi 2024-cü il aprelin 9-da keçirilib.
UEFA-nın 4-cü kateqoriya standartlarına uyğun inşa ediləcək stadionun tamaşaçı tutumu layihə üzrə 15 min 464 yerlikdir. Stadionda VVIP, VIP, SKY-box, media nümayəndələri və fiziki imkanları məhdud tamaşaçılar üçün müvafiq sayda oturacaq sahələri, futbolçular üçün soyunub-geyinmə, konfrans, tibb, hakimlər, texniki heyət üçün otaqlar və sair zəruri sahələr nəzərdə tutulur.
Bu mənada Davosda imzalanan son saziş gəncəlilər üçün mühüm yeniliklərə səbəb olacaq.(bizim.media.az)
