Gəncədə rəsm müsabiqəsi keçiriləcək. Bu haqda 24 avqust tarixində Regional Gənclər və İdman İdarəsinə istinadən məlumat veririk.
Yeniyetmə və gənclər arasında “Dünyamıza sülh gərəkdir” adlı müsabiqə 21 Sentyabr – Beynəlxalq Sülh Günü münasibətilə təşkil olunacaq. Tədbirin təşkilatçıları Gəncə-Daşkəsən Regional Gənclər və İdman İdarəsi və Gəncə Gənclər Evidir.
Müsabiqə 2 hissədə təşkil olunur. Birinci hissə açıq məkanda həyata keçirilir, final mərhələsində isə sərgi baş tutacaq və qiymətləndirmə aparılacaq. İştirakçılar 14-29 yaş arasında olmalıdırlar. Burada hər fərd yalnız bir işlə iştirak edə bilər.
Rəsmlər A-3 formatında müxtəlif texnikada (flomaster, quaş, sulu boya, yağlı boya və s.) işlənməlidir. Münsiflər heyətinin rəyinə əsasən, qalib 4 nəfər ( I-III və 1 həvəsləndirici yerlər) seçiləcək. I - III və həvəsləndirici yerləri tutan yeniyetmə və gənclər Regional Gənclər və İdman İdarəsi və Gənclər Evinin rəhbərliyi tərəfindən hədiyyə və diplomlarla təltif olunacaqlar.
