Gəncədə gənclər arasında radikalizmin profilaktikasına həsr olunmuş film göstərilib. Bu haqda 1 sentyabr tarixində Regional Gənclər və İdman İdarəsinə istinadən xəbər veririk.
"Dəmir Yumruq" filminin nümayişi təşkil olunub. Tədbirdə şəhidlik, vətən anlayışı, dinimizin Vətən uğrunda mübarizəyə verdiyi dəyərlər barədə danışılıb. Burada Gəncə-Daşkəsən Regional Gənclər və İdman İdarəsinin rəisi İntiqam Hüseynov, Dini Qurumlarla İş üzrə Dövlət Komitəsinin müdiri Həsən Məmmədov, şöbə müdirinin müavini Elmar Fətəliyev çıxış ediblər. Onlar qeyri-ənənəvi dini cərəyanlar və radikalizm barəsində danışıblar.
Qurum əməkdaşları, həmçinin ölkədəki dini durum və onların icmalarının fəaliyyəti, dövlətin dinə qayğısı və tolerantlıq siyasəti, Azərbaycanın ənənəvi İslam ölkəsi olmaqla eyni zamanda dünyəvi, demokrat dövlət olması, xalqımızın milli ənənələrini, milli-mənəvi dəyərləri yaşatmağa çalışması, multikultural dəyərlərə böyük hörmətlə yanaşması barədə məlumatları tədbir iştirakçılarının diqqətinə çatdırıblar.
Qeyd edək ki, tədbir Dini Qurumlarla İş üzrə Dövlət Komitəsinin Gəncə bölgəsi üzrə şöbəsinin və Gəncə Gənclər Evi SXM-in birgə təşkilatçılığı ilə təşkil olunub.
