2026-cı ilin yanvar-avqust aylarında Bakı, Naxçıvan və Gəncə hava limanları birlikdə 5.7 milyondan çox sərnişinə xidmət göstərib, 46 mindən çox uçuş həyata keçirib. Üç hava limanı üzrə ümumi sərnişin dövriyyəsi 2025-ci ilin eyni dövründəki səviyyəni qoruyub, uçuşların sayı isə 1.5% artıb.
Gencexeber.az bildirir ki, bu barədə Heydər Əliyev Beynəlxalq Aeroportunun Mətbuat Xidməti məlumat yayıb.
Gəncə Beynəlxalq Hava Limanında 2026-cı ilin ilk səkkiz ayında 147 min sərnişinə xidmət göstərilib və 1107 uçuş həyata keçirilib. 2025-ci ilin yanvar-avqust ayları ilə müqayisədə sərnişinlərin sayı 4.9%, uçuşların sayı isə 2.1% artıb.
Regionda davam edən geosiyasi qeyri-müəyyənlik və hava nəqliyyatına təsir edən dəyişikliklər fonunda ümumi sərnişin axınının 2025-ci ilin eyni dövründəki səviyyəni qoruması, transfer və regional daşımalar üzrə isə artımın davam etməsi sərnişin tələbatının dayanıqlığını göstərir.
