Azərbaycan SSR Əməkdar mədəniyyət işçisi Şirin Rzayev yaşasaydı, bu gün 83 yaşı tamam olurdu.
Gencexeber.az xatırladır ki, 25 aprel 1942-ci ildə Gəncədə anadan olub.
Şirin Rzayev 1969-cu ildə Gəncədə ilk simfonik orkestri yaradıb, onun bədii rəhbəri və dirijoru olub.
Rzayev 1959-cu ildə Gəncədə 1 saylı orta məktəbi bitirib, Gəncə şəhər Musiqi Texnikumunda kamança şöbəsinə daxil olub. Bundan sonra o, 1961-ci ildə Azərbaycan Dövlət Konservatoriyasının xor dirijoru fakültəsində təhsil alıb.
Maestro Şirin 1980-ci ildə Gəncədə “Şərəfxanlı” el nəğmələri teatrı folklor xorunu yaradıb. Bu xor 1981-ci ildə Moskvada Ümumittifaq festivalında iştirak edib və Şirin Rzayev qızıl, kollektiv isə gümüş medalla təltif olunub.
Şirin Rzayev 1980-1990-cı illərdə IV çağırış Şəhər Xalq Deputatları Sovetinə deputat seçilib.
O, 1990-cı ildə Fikrət Əmirov adına Gəncə Dövlət Filarmoniyasının direktoru vəzifəsinə təyin olunub. Həmin ildən maestro “Göygöl” dövlət mahnı və rəqs ansamblına rəhbərlik edib. Şirin Rzayev 1997-ci ildən dirijorluq fəaliyyətini Gəncə Dövlət Kamera Orkestrində davam etdirib. 1995-2011-ci illərdə Gəncə Dövlət Kamera Orkestrinin bədii rəhbəri və baş dirijoru kimi işləyib. Həmçinin Gəncə Musiqi Kollecində pedaqoji fəaliyyətini davam etdirib. O, Gəncənin baş xormeystri olub.
Maestro Şirin Rzayev 14 fevral 2020-ci ildə 77 yaşında Gəncədə vəfat edib.
