Bu gün Gəncə futbolunun tanınmış simalarından olan Mübariz Zeynalovun dünyaya gəldiyi gündür.
Gencexeber.az məlumat verir ki, Mübariz Zeynalov 1945-ci il mart ayının 18-də Gəncə şəhərində doğulub. Uşaq yaşlarından futbola böyük həvəsi olub.
"Alüminium zavodu" futbol komandasında oynayan Ağa Abbasov adlı qonşusu küçədə 15-16 yaşlı Mübarizin oyununu görüb onu komandaya dəvət edib. Orada məşqçilər tərəfindən bəyənilən Zeynalov bir müddət "Alüminium zavodu" komandasında oynayır. 17 yaşında isə SSRİ çempionatının ikinci dəstəsində mübarizə aparan Gəncənin "Dinamo" klubuna cəlb olunur. 1964-cü ildə "Dinamo"nun əsas heyətinə qoşulur. Bir il sonra komandanın SSRİ çempionatının güclülər dəstəsinə vəsiqə qazanmasında Mübariz Zeynalovun da müstəsna rolu olur.
1966-cı ilin may ayında Bakıda "Dinamo" - "Krasnodar" oyunu keçirilir. Görüş başa çatandan sonra "Neftçi"nin rəisi və baş məşqçisi Vasili Sokolov, eləcə də Ali Sovetin Rəyasət Heyəti sədrinin müşaviri Tofiq Bağırov paltardəyişmə otağına gələrək Mübariz Zeynalov ilə Nizami Salahova Bakının "Neftçi" klubunda keçməsini təklif edirlər.
Bununla da may ayında ölkənin əsas komandasına dəvət olunan Zeynalov mövsümün sonunadək 20 oyun keçirərək "Neftçi"nin bürünc medallar qazanmasında da pay sahibi olur. Qısa vaxt ərzində, 20 oyunda, yəni görüşlərin 50 faizindən çoxunda iştirak etdiyi üçün bürünc medala layiq görülən 12 futbolçudan biri kimi tarixə düşür.
O, 1968-ci ildə dizindən aldığı ciddi zədədən sonra Moskvada əməliyyat olunaraq, 1 il futboldan kənarda qalmalı olur. 1969-cu il mövsümün yarısında yenidən oynamağa başlasa da, zədə özünü göstərdiyi üçün əvvəlki formasını bərpa edə bilmir. Məhz bu səbəbdən 1972-ci ildə "Neftçi"dən ayrılan hücumameylli yarımmüdafiəçi Gəncəyə qayıdaraq daha iki il oynayandan sonra 1974-cü ildə, 29 yaşında futbolçu karyerasını başa vurur.
Bununla belə, sevdiyi idman növündən tamamilə ayrı düşmür. 1992-ci ildə Ruslan Abdullayev və Ağasəlim Mircavadovla birgə Azərbaycan milli komandasının ilk məşqçilərindən olan Mübariz Zeynalov 1993-cü ildə 1 il müddətinə "Kəpəz" klubunun baş məşqçisi olur. 2015-ci il martın 31-dən ömrünün son gününədək "Neftçi" PFK-nın Müşahidə Şurasının üzvü vəzifəsində çalışıb.
Mübariz Zeynalov 2015-ci ilin avqust ayının 8-də uzun müddət müalicə aldığı Mərkəzi Neftçilər Xəstəxanasında dünyasını dəyişib.
