Əməkdar incəsənət xadimi Zeynal Xəlilin vəfatından 50 il ötür.
Zeynal Xəlil 1914-cü ildə Yelizavetpol (müasir Gəncə) şəhərində anadan olub. 1932-ci ildə Azərbaycan Dövlət Pedaqoji İnstitutunun dil və ədəbiyyat fakültəsinə daxil olub.
O, bədii yaradıcılığa 17 yaşında olarkən başlayıb.
Zeynal Xəlilin bir dramaturq kimi də ədəbiyyatımızın inkişafında xidmətləri çoxdur. Onun ilk pyesi “İntiqam” bir çox teatrlarda tamaşaya qoyulmuşdu. Belə əsərlərdən biri də uzun zaman səhnədən düşməyən “Qatır Məmməd” pyesidir.
Şair az müddət ərzində Səməd Vurğun, Mikayıl Müşfiq, Rəsul Rza, Süleyman Rüstəm, Məmməd Rahim, Osman Sarıvəlli kimi söz ustaları arasında tanınıb. Zeynalın “İstək” adlı ilk şeirlər kitabı 1936-cı ildə çap olunub. İkinci Dünya müharibəsi illərində şair “Yəhərləyin atları”, “416”, “Döyüşçünün vəsiyyəti” və başqa şeirlərini, “Tatyana” poemasını yazıb.
O, 1964-cü ildə “Əməkdar incəsənət xadimi” fəxri adına, “Şərəf nişanı” ordeni və medallara layiq görülüb.
Zeynal Xəlilov 11 avqust 1973-cü ildə vəfat edib və II Fəxri xiyabanda dəfn olunub. Hazırda Gəncədə Ozan küçəsində yaşadığı evin divarında xatirə lövhəsi mövcuddur.
