Birinci Qarabağ müharibəsi zamanı şəhadətə ucalmış Natiq Sabir oğlu Əliyev və Mübariz Ağamməd oğlu Qurbanovun anadan olduqları gündür.
Əliyev Natiq Sabir oğlu 1974-cü il yanvar ayının 22-də Gəncədə anadan olub. 5 saylı məktəbi qızıl medalla bitirən igidimiz 1992-ci ildə Nizami Rayon Hərbi Komissarlığı tərəfindən hərbi xidmətə çağırılıb. Zəngilanın işğalı zamanı Natiqin dəstəsi 12 gün mühasirədə qalaraq 1993-cü ilin yanvarında əsir düşüb. 18 gün əsirlikdə qalan Natiq igidlik göstərərək ermənilərdən 3 tank gətirmişdir. Hücumda hər an öndə olan Natiq Əliyev 1993-cü il dekabrın 30-da Şişqayaya hücuma keçərkən şəhidlik zirvəsinə ucalıb.
Mübariz Qurbanov 1965-ci il iyunun 5-də Gəncə şəhərində dünyaya göz açıb. 16 saylı məktəbi bitirən Mübariz 1985-ci ildə Kemerovo vilayətində hərbi xidməti başa vurduqdan sonra gəncədə Toxuculuq kombinatında işləyib. Sonralar bir müddət 2 nömrəli Şərab Zavodunda çalışıb. Birinci Qarabağ müharibəsi zamanı Birinci Gəncə Taborunun tərkibində Todan, Erkəc, Mənəş, Buzbulaq kəndlərinin, habelə keçmiş Şaumyan (indiki Aşağı Ağcakənd) rayonunun və Gülüstan qəsəbəsinin düşməndən təmizlənməsində iştirak edib.
İgidimiz Mübariz Qurbanov 1992-ci il iyul ayının 18-də yaralı dostunu xilas edərkən qəhrəmancasına şəhid olub. Cənazəsi 1992-ci il iyulun 20-də Gəncəyə gətirilərək Gəncənin Şəhidlər xiyabanında dəfn olunub.
