Bir müddət əvvəl redaksiyamız tərəfindən Gəncədə Heydər Əliyev prospektində işıqlandırma sisteminin zəif olması ilə bağlı, eyni zamanda Göygöl rayonunun Quşqara kəndində işıqlandırma sisteminin olmaması haqqında məqalə dərc etmişdik.
Gəncə şəhər İcra Hakimiyyəti sözügedən məsələlərlə bağlı Gencexeber.az-a açıqlama verib.
Heydər Əliyev prospektində işıqlandırma sisteminin zəif olması ilə bağlı qurumdan bildirilib ki, Gəncə şəhər Mənzil Kommunal Təsərrüfatı İstehsalat Birliyinin (MKTİB) Küçə işıqlandırması şöbəsindən verilən məlumata əsasən, şəhərin küçə və prospektlərində olan küçə işıqları müvafiq normalara uyğun şəkildə quraşdırılıb.
“Bununla yanaşı qeyd edilib ki, Gəncə şəhərinin bir sıra küçə və prospektlərində nasaz və ya tamamilə işləməyən lampalar var. Həmin lampaların dəyişdirilməsi məqsədi ilə yeniləri sifariş olunub və yaxın günlərdə mövcud problemin aradan qaldırılması istiqamətində müvafiq tədbirlər həyata keçiriləcək”.
Göygöl rayonunun Quşqara kəndində gecə işıqlandırılması ilə bağlı bildirilib ki, Gəncə-Şəmkir magistral avtomobil yolu Azərbaycan Avtomobil Yolları Dövlət Agentliyinin “Avtomobil Yollarının Mühafizə Xidməti” MMC-nin Gəncə Regional şöbəsinin balansındadır:
“Qeyd olunan avtomobil yolunda gecə işıqlandırmasının qurulması Azərbaycan Avtomobil Yolları Dövlət Agentliyinin “Avtomobil Yollarının Mühafizə Xidməti” MMC-nin tədbirlər planına salınıb və gələcəkdə icra olunması nəzərdə tutulub”.
