Gəncə Ağır Cinayətlər Məhkəməsində xuliqanlıq niyyətilə qəsdən sağlamlığa ağır zərər vurmada və xuliqanlıqda təqsirləndirilən Samir Əbdülovun (soyadı şərtidir) cinayət işi üzrə məhkəmə istintaqı başa çatıb.
Hakim Bəhruz Müslümovun sədrliyi ilə keçirilən prosesdə hökm oxunub. Məhkəmənin hökmü ilə o, cəzasını ümumi rejimli cəzaçəkmə müəssisəsində çəkməklə 6 il 6 ay müddətə azadlıqdan məhrum edilib.
İttiham aktına əsasən, təqsirləndirilən şəxs xuliqanlıq niyyəti ilə ictimai qaydanı kobud şəkildə pozub, cəmiyyətə açıqca hörmətsizlik ifadə edən hərəkətlərə yol verib və bu zaman silah qismində istifadə etdiyi əşya ilə zərərçəkmiş Salman Səfərova (soyadı şərtidir) xəsarət yetirib.
Hadisə Gəncə şəhərində yerləşən "Böyük Ucuzluq" ticarət mərkəzinin qarşısındakı dayanacaqda baş verib.
Həmin vaxt orada qeyri-rəsmi parklanma nəzarətçisi kimi işləyən Salman Səfərovla Samir Əbdülov arasında mübahisə yaranıb. Təqsirləndirilən şəxs zərərçəkmiş şəxsin onu həmin ərazidən uzaqlaşdırmaq istəməsini bəhanə edərək ətrafdakı insanların olmasına baxmayaraq cibində saxladığı mətbəx bıçağı ilə Salmanın sol qol nahiyəsinə, eləcə də qarın nahiyəsinə zərbələr vurub.
Mənbə: pravda.аz
