Gəncə-Daşkəsən Regional Təhsil İdarəsinin müdiri Elçin Kərimov bir qrup müəllimə pul mükafatı verilməsi ilə bağlı əmr imzalayıb.
Gencexeber.az bildirir ki, bu barədə regional idarə məlumat yayıb.
Bildirilib ki, Elçin Kərimov Respublika Fənn Olimpiadasında, Lütfi Zadə adına riyaziyyat-məntiq olimpiadası, Respublika Fənn Müsabiqəsi, “Ən yaxşı təqdimat” müsabiqəsi, “SAF Azərbaycan” müsabiqələrində və IV siniflər üzrə həyata keçirilən monitorinqdə yüksək nəticə göstərən şagirdlərin müəllimlərinə pul mükafatlarının verilməsi ilə bağlı əmr imzalayıb. Bu əmrə əsasən 23 nəfər müəllim pul mükafatına layiq görülüb.
Qeyd olunub ki, 2023-2024-cü tədris ilində Gəncə-Daşkəsən Regional Təhsil İdarəsi üzrə Respublika Fənn Olimpiadasında 2 nəfər şagird bürünc, 1 nəfər qızıl medala layiq görülüb. Bununla yanaşı 8 nəfər şagird SAF Azərbaycanda, 3 nəfər şagird “Ən yaxşı təqdimat”, 3 nəfər şagird Lütfi Zadə adına riyaziyyat-məntiq olimpiadası, 4 nəfər Respublika Fənn Müsabiqəsində müvafiq yerlərə layiq görülüb.
