Gəncədə mülki müdafiə ilə əlaqədar növbəti tədbir keçirilib. Bu haqda 1 sentyabr tarixində FHN-ə istinadən məlumat veririk.
“Fövqəladə hadisələrin nəticələrinin aradan qaldırılması zamanı mülki müdafiə orqan və qüvvələrinin idarə edilməsinin təşkili” mövzusunda nümunəvi obyekt mülki müdafiə məşqi “Azəralüminium” MMC-də təşkil olunub. Burada FHN-in Gəncə Regional Mərkəzinin, Gəncə şəhər Yanğından Mühafizə İdarəsinin, Azərbaycan Qızıl Aypara Cəmiyyətinin, şəhər Təcili və Təxirəsalınmaz Tibbi yardım Stansiyasının, həmçinin müəssisənin mülki müdafiə qüvvələrinin şəxsi heyəti və texnikası iştirak edib.
Məşq iki mərhələdə keçirilib. Birinci hissə xəbərdarlıq və toplanış siqnalı ilə başlanıb. Məşqə cəlb olunmuş rəhbər heyət rabitə və xəbərdarlıq sxeminə uyğun olaraq toplanıb, şərti olaraq baş vermiş fövqəladə hadisə barədə məlumatlar çatdırılıb. Obyektin mülki müdafiə planı və hər bir vəzifəli şəxsin funksional vəzifələri nəzərdən keçirilib, xilasetmə işlərinə cəlb olunacaq qüvvə və vasitələrin hesabatı dəqiqləşdirilib.
İkinci mərhələdə fövqəladə hallar zamanı rəhbər heyətin mülki müdafiə qüvvələrini idarə və düzgün qərarlar qəbul etmək, mülki müdafiə qüvvələrinin fövqəladə hadisə baş vermiş ərazilərdə xilasetmə və digər təxirəsalınmaz işləri aparmaq bacarığı əyani nümayiş olunub. Baş vermiş şərti fövqəladə hadisələr (zəlzələ, yanğın, partlayış) barədə kəşfiyyat məlumatlarına əsasən, əraziyə mülki müdafiə qüvvələri yeridilib, şərti xəsarət alanlar təhlükəli ərazidən çıxarılıb, ilkin tibbi yardım göstərilərək aidiyyəti üzrə təhvil verilib. Məşqin gedişi zamanı verilən məlumatlar xəritədə öz əksini tapıb və obyekt rəhbərinin müvafiq əmrləri hazırlanıb.
Sonda məşqin yekunu ilə əlaqədar təhlillər aparılıb, nöqsan və çatışmazlıqlar müzakirə olunub.
