Gəncədə təhsil alan bir neçə tələbə xaricdə oxuyacaq. Bu haqda 8 sentyabr tarixində ATU-ya istinadən məlumat veririk.
Azərbaycan Texnologiya Universitetinin 4 tələbəsi növbəti semestrdən təhsilini Avropada davam etdirəcək. Universitetin rektor əvəzi dosent Yaşar Ömərov mübadilə proqramı çərçivəsində xaricə gedən tələbələrlə görüşüb. O, gəncləri uğurları münasibətilə təbrik edərək müvəffəqiyyətlər arzulayıb, ölkəmizi və universiteti layiqincə təmsil edərək bilik və bacarıqlarını artırmağı tövsiyə edib.
Görüşdə iştirak edən tələbələr Erasmus+ mübadilə proqramı çərçivəsində 2023/2024-cü tədris ili üçün 1 semestr müddətində Avropa ölkələrində təhsil alacaqlar. Kompüter mühəndisliyi ixtisasının II kurs magistrantları Sahib Əlihüseynov və Bəsti Cəfərova İspaniyanın Caen (Jaen) Universitetində, dizayn ixtisasının II kurs tələbələri Həsənzadə Murad Rumıniyanın İaşi Texniki Universitetində, Günel Hacıyeva isə Polşanın Varşava Ekologiya və Menecment Universitetində təhsillərini davam etdirəcəklər.
