"Daha çox nəticə göstərən, daha çox iş görən həkimlərimiz daha çox qiymətləndirilməli, daha çox əməkhaqqı almalıdır".
Bunu TƏBİB-in (Tibbi Ərazi Bölmələrini İdarəetmə Birliyi) icraçı direktoru Anar Bayramov mətbuat konfransında jurnalistlərin sualını cavablayarkən deyib.
O bildirib ki, səhiyyə elə bir sahədir ki, burada islahatlar davamlı olmalıdır:
"İslahatlar mütəmadi şəkildə aparılmalı və səhiyyə sistemi daim təkmilləşdirilməlidir. Ümumiyyətlə, səhiyyə sistemində ən önəmli göstərici həkimə müraciətlərin, çağırışların və müayinələrin sayı deyil. Əsas göstərici görülən müayinə və ya müalicənin insanların sağlamlığına necə təsir etməsidir. Ona görə də bu istiqamətdə ardıcıl tədbirlər görməliyik və düşüncə tərzimizi də dəyişməliyik. Növbəti mərhələlərdə həkimlərin ödənişində nəticəyönümlü mexanizmə keçməliyik. Ümumiyyətlə, səhiyyə sistemimiz xəstəliyə reaksiya verən sistemdən sağlamlığı idarə edən sistemə keçməlidir".
Mənbə: apa.аz
