Gəncədə mədəniyyət xadimi ilə görüş keçirilib. Bu haqda 16 avqust tarixində Regional Mədəniyyət idarəsinə istinadən məlumat veririk.
Gəncə ədəbi mühitinin görkəmli nümayəndələrindən biri 11 kitab, 18 pyes və 300-dən çox şeir müəllifi şair Zaur Quliyev Gəncə-Daşkəsən Regional Mədəniyyət İdarəsində olub. Burada idarənin rəisi vəzifəsini icra edən Pərvin Kazımov şairə yaradıcılığında uğurlar arzulayıb.
Daha sonra mədəniyyət sahəsində 50 illik fəaliyyətinə görə Zaur Quliyev Mədəniyyət naziri Adil Kərimli tərəfindən imzalanmış Fəxri Fərmanla təltif olunub.
Keçirilən görüşdə qeyd olunub ki, qədim ənənələrə söykənən zəngin Gəncə ədəbi mühiti günümüzdə də görkəmli yazıçı və şairlərin əsərləri ilə oxucuları sevindirir.
