Azərbaycan Dövlət Aqrar Universiteti (ADAU) ilə Türkiyənin EGE Universiteti arasında həyata keçirilən beynəlxalq ikili diplom proqramı çərçivəsində təhsil alan tələbələrin 4 elmi-tədqiqat layihəsi Türkiyənin Elmi və Texnoloji Tədqiqatlar Şurası (TÜBİTAK) tərəfindən qəbul olunaraq dəstək qazanıb.
Gencexeber.az ADAU-ya istinadən məlumat verir ki, layihələr toxum texnologiyaları və bitki stresslərinə davamlılıq sahəsində aparılan tədqiqatları əhatə edir.
Tədqiqatlarda aktiv iştirak edən tələbələr – Yusif Osmanlı, Orxan Əliyev və Ruslan Kosaevi fərqli bitkilər üzərində priming metodlarını sınaqdan keçirməklə toxum gücünün artırılması və daha homojen çıxışın təmin olunması istiqamətində elmi əsaslar ortaya qoyublar.
Digər bir layihə çərçivəsində isə tələbə Hüseyn Bağırlı buğda bitkisində fotoprotektiv piqmentlərin (xüsusilə karotinoidlərin) müxtəlif genotiplərdə miqdarını təhlil edərək, iqlim dəyişikliklərinə davamlı sortların seçilməsi istiqamətində mühüm nəticələr əldə edib.
