Gəncədə tibb müəssisələrində yenidənqurma işləri aparılıb. Bu haqda 24 iyun tarixində İcra Hakimiyyətinə istinadən məlumat veririk.
İcra başçısı Niyazi Bayramov, İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyev və Tibbi Ərazi Bölmələrini İdarəetmə Birliyinin (TƏBİB) icraçı direktoru Vüqar Qurbanov şəhər Birləşmiş Xəstəxanasının tabeliyində olan Abbas Səhhət adına Xəstəxanada yeni yaradılan Nevrologiya və Terapiya şöbəsinin açılışında iştirak ediblər. Onlar, həmçinin Akademik Z.Məmmədov adına Xəstəxanada Təcili yardım, Reanimasiya, Cərrahiyyə şöbələri, Laboratoriya və əməliyyat blokunda, Uşaq xəstəxanasının Təcili yardım və poliklinika şöbəsində aparılan yenidənqurma işləri ilə tanış olublar.
Bildirilib ki, həyata keçirilmiş yeniliklər vətəndaşların tibbi xidmətlərə əlçatanlığına xidmət edəcək. Gəncə ŞBX-nin direktoru İlkin İsmayılov qeyd edib ki, icbari tibbi sığortanın tətbiqindən sonra əhalinin tibbi xidmətlərə əlçatanlığını təmin etmək üçün xəstəxanalarda yeni şöbələr yaradılıb. Nevrologiya və Terapiya şöbələrinin hər biri 100 çarpayılıq, yenidən qurulan Cərrahiyyə şöbəsi 70, Reanimasiya şöbəsi isə 10 çarpayılıqdır”.
Daha sonra tibb müəssisəsində yaradılmış ümumi şəraitlə tanışlıq olub.
