Şəmkirdə kişi xəstə qıza təcavüz edib.
Gencexeber.az-ın əldə etdiyi məlumata görə, hadisənin istintaqı Gəncə Ağır Cinayətlər Məhkəməsində keçirilib.
Belə ki, təqsirləndirilən Bayram 1956-cı ildə Şəmkir rayonunda anadan olub. O, qonşusu Vahidin (ad şərtidir) evinə dəfələrlə qonaq kimi gedib. Bu müddətdə Vahidin “davranış pozğunluğu ilə müşayiət olunan yüngül dərəcəli əqli gerilik” xəstəliyindən əziyyət çəkən 27 yaşlı qızının olduğunu bilib. Əqli durumu normal olmadığını bildiyi halda Vahidin qızı Almazı (ad şərtidir) zorlamaq qərarına gəlib. Almazın evdə tək olduğunu bilib, onlara gedib. Qızın razılığı olmadan onunla məcburi cinsi münasibətdə olub. Bayram bu hərəkətini dəfələrlə təkrarlayıb. Cinsi münasibətdən sonra Almaz hamilə qalıb. Qadın 6 aylıq hamilə olan zaman hadisənin üstü açılıb.
Bayram Azərbaycan Respublikası CM-nin 149.2.5 və 150.2.5-ci maddələri ilə təqsirləndirilib.
“10-15 dəfə cinsi əlaqədə olduq…”
Məhkəmədə təqsirləndirilən Bayram ittiham üzrə özünü təqsirli bilməyib:
“İl yarım vaxt ərzində bir gündən bir Vahidgilin evinə gedib-gəlirdim. Bir gün onun qızı Almaz məndən 20 manat borc pul istədi. Bundan sonra dəfələrlə 5, 10 manat borc aldı. Almaz tək olduğu vaxt məni evə çağırdı. Evə girən kimi nə üçün çağırdığını soruşdum. Mənə macal vermədən dartaraq yataq otağına apardı. Birlikdə cinsi əlaqədə olduq.
Daha sonra mənə dəfələrlə zəng edir, mesaj yazırdı. Almaz ilə təxminən 10-15 dəfə cinsi əlaqədə olmuşuq. Mən hər dəfə onlara gedəndə Almaz göz-qaş edirdi. Psixi durumunun yaxşı olmadığını bildiyim üçün fikir vermirdim. Onun 6 aylıq hamilə olduğunu biləndə abort üçün 90 manat verdim”.
“Bayram mənə təcavüz edəndə ögey anam evdə idi…”
Daha sonra zərərçəkmiş Almaz məhkəmədə ifadə verib:
“Bayram bizim qonşumuzdur. Tez-tez bizə gəlib gedirdi. Bayram ögey anama da pul vermişdi. Bir gün qab yuyanda Bayram gəlib məni arxadan qucaqladı. Boğazıma bıçaq dayadı və məni istədiyini dedi. Mənimlə məcbur cinsi əlaqədə oldu. Məni buna məcbur elədi. Ögey anam da evdə idi. İlk dəfə cinsi əlaqədə olanda məndən qan gəldiyini ögey anama dedim. O da heç nə olmayacağını dedi. Ögey anam evdə olsa da, heç nə etmədi. Bu hal dəfələrlə yaşandı.
Hamilə olduğumu öyrəndikdə hər şeyi bacıma danışdım. Uşağın Bayramdan olduğunu da dedim. Onun dedikləri yalandı. Mən Bayramdan pul almamışam”.
İstintaqda məlum olub ki, Bayramla Almazın ögey anasının münasibəti varmış. Bayram dəfələrlə onun ögey anasına bazarlıq etmiş, pullar vermişdir.
Məhkəmənin qərarı ilə Bayram 9 il müddətində azadlıqdan məhrum edilib.
Fidan İlqar
