Əməliyyat zamanı pasiyentin komaya düşməsinə səbəb olmaqda təqsirləndirilən lor, estetik cərrah Yaqub Əsədi apellyasiya şikayəti verib.
Bu barədə zərərçəkmiş şəxsin vəkili Rusif Eminli məlumat verib.
Onun sözlərinə görə, ötən gün Nəsimi Rayon Rayon Məhkəməsində keçirilən prosesdə Yaqub Əsədinin apellyasiya şikayətinin verilməsi üçün müddətin bərpa olunmasına dair ərizəyə baxılıb.
Qərara əsasən, müddət bərpa edilib və cinayət işi baxılması üçün Bakı Apellyasiya Məhkəməsinə göndərilib.
Xatırladaq ki, bu ilin mayında Nəsimi Rayon Məhkəməsində elan edilən hökmə əsasən, 2 il müddətinə həkim fəaliyyəti ilə məşğul olmaq hüququndan məhrum edilməklə cərrah və anestezioloqa 3 il müddətinə azadlıqdan məhrum etmə cəzası təyin edilib.
Mülki iddia isə qismən təmin edilib. Yaqub Əsədidən 14 min manat, Cəmilə Əliyevadan isə 61 min manat pul vəsaitinin tutulmasına və zərərçəkənə ödənilməsinə qərar verilib.
Qeyd edək ki, ötən ilin aprel ayında Bakıda yerləşən "MedAura" Klinikasında rinoplastika əməliyyatı olunan 34 yaşlı Nigar Budaqlı komaya düşüb və vəfat edib.
Cərrah və anestezioloqa Cinayət Məcəlləsinin 314.2-ci maddəsi ilə ittiham irəli sürülüb.
Mənbə: unikal.аz
