Gədəbəydə 34 il əvvəl törədilmiş qəsdən adam öldürmə cinayətinin üstü açılıb.
Gencexeber.az-a bu barədə Baş Prokurorluğun Mətbuat xidmətindən məlumat verilib.
Belə ki, 1992-ci il mayın 31-də Gədəbəy rayonu, Turşsu kəndi yaxınlığında, "Bəkdəmir yalı" adlanan ərazidə üzərində zorakılıq əlamətləri olan Məmmədov Şahbaz Abuzər oğlunun meyitinin aşkar edilməsi faktı ilə bağlı rayon prokurorluğunda həmin vaxt qüvvədə olan Cinayət Məcəlləsinin 95-ci maddəsi ilə cinayət işi başlanaraq ibtidai istintaq aparılıb.
Cinayət işinin materiallarının, habelə işlə bağlı açılmış əməliyyat-qeydiyyat işinin yenidən öyrənilməsi zamanı cinayətin açılması üçün əlavə istintaq hərəkətlərinin və əməliyyat-axtarış tədbirlərinin həyata keçirilməsinə zərurət olduğu müəyyən edilib.
Aparılmış istintaq hərəkətləri və keçirilən əməliyyat-axtarış tədbirləri nəticəsində 1969-cu il təvəllüdlü Polad Məmmədovun 1992-ci ilin may ayında atası Şahbaz Məmmədovun başına bir neçə dəfə ağacla vuraraq qəsdən öldürməsinə dair əsaslı şübhələr müəyyən edilib. O, törətdiyi cinayəti gizlətmək və hadisənin başqa yerdə baş verdiyi barədə yanlış təsəvvür yaratmaq məqsədilə atasının meyitini bir neçə gün sonra "Bəkdəmir yalı" adlanan əraziyə aparıb.
O, əməlini etiraf edib və 2026-cı il avqustun 31-də şübhəli şəxs qismində tutulub.
Həmin tarixdə Poladın əməli 2000-ci il sentyabrın 1-dək qüvvədə olmuş Cinayət Məcəlləsinin 95-ci maddəsindən həmin Məcəllənin 94-cü maddəsinin 6-cı bəndinə tövsif edilib.
Cinayət işi üzrə ibtidai istintaq davam etdirilir.
