Şəmkir rayonunda 17 yaşlı oğlan həmyaşıdını qətlə yetirməkdə ittiham olunub.
Qətl hadisəsi 2024-cü ilin oktyabrın 1-də baş verib. Gəncə şəhər sakini, 2009-cu il təvəllüdlü Ayxan həmyaşıdı Əlini (adlar şərtidir) bıçaqlayıb.
İş üzrə izahat verən Ayxan ona elan olunmuş ittiham üzrə özünü təqsirli bilib. O, ifadəsində göstərib ki, Əliylə qonşu və uzaq qohum olub:
"Yaxın dostluq münasibətində olduğumuz üçün aramızda zarafatlarımız olub. 2024-cü il sentyabrın 30-da Əligilin yaşadığı evin qarşısında zarafatyana günəbaxan tumunu onun üzünə atdım. Atdığım tum onun gözünə dəydi. Əli əsəbiləşərək yerdən daş götürdü və mənə tərəf atdı. Daş mənə dəymədiyi üçün yenidən daş götürərək arxamca qaçmağa başladı. Mən Əliyə zarafat etdiyimi desəm də, o, özümü və ailə üzvlərimi söydü".
Ayxanın ifadəsinə görə, səhəri gün məsələni həll etmək üçün Əli onu söhbətə çağırıb.
"Əli ilə görüşməyə gedəndə yolda dostum Aqili də götürdüm. Əliyə etdiyimiz hərəkətlərə görə bir-birimizdən üzr istəyib, söhbəti bağlamağı təklif etdim. O isə razılaşmadı və yumruqla sinəmə vurdu. Aramızdakı mübahisə zamanı Əlini bıçaqladım. Sonra atama Əlini bıçaqladığımı dedim. Atamla polisə gedərək könüllü olaraq törətdiyim əməli etiraf etdim və təslim oldum", - təqsirləndirilən şəxs bildirib.
Oğlu öldürülən ata Ayxanın qətli tək törətmədiyini iddia edib. O, bu cinayətdə iş üzrə adı keçən Aqilin də məsuliyyətə cəlb olunmasını istəyib.
Gəncə Ağır Cinayətlər Məhkəməsinin hökmü ilə Ayxan 7 il 6 ay müddətinə azadlıqdan məhrum edilib.
Mənbə: demokrat.аz
