Gəncədə bir sıra küçə və prospektlərdə piyada zolaqları silinib. Bu haqda 5 yanvar tarixində ATV-yə istinadən məlumat veririk.
Mövcud vəziyyət şəhərin Atatürk, Nizami Gəncəvi, Şah İsmayıl Xətai prospektlərində və bir çox digər küçələrdə hökm sürür. Vaxtında yenilənməyən piyada zolaqları həm piyadalar, həm də sürücülər üçün təhlükə yaradır. Çıxılmaz vəziyyətdə qalan narazı piyadalar ya yolların tamamilə boşalmasını gözləməli, ya da özünü avtomobilin qarşısına atmalı olurlar.
Keçid xətlərinin silinməsi sürücüləri də narahat edir. Onların sözlərinə görə, xətlərin yaxşı görünməməsi, əsasən, axşam saatlarında sürücü və piyadalar üçün təhlükə yaradır.
DİN-in mətbuat xidmətinin Gəncə regional qrupunun baş inspektoru, polis kapitanı Eşqin Qasımov bildirib ki, hazırda şəhərin bir hissəsində yeni infrastruktur layihələri keçirilir. İşlər başa çatdıqdan sonra orada yeni yol nişanlarının qoyulması və xətlərin bərpası nəzərdə tutulub. Bundan başqa, şəhərdə avtomobillərin intensiv olduğu bir neçə yerdə mütəmadi olaraq nişanlanma işləri aparılır.
