Gəncə şəhərinin Gülüstan yaşayış massivində yerləşən İstiqlal parkının infrastrukturuna ziyan vurulub.
Gencexeber.az-a Gəncə Şəhər İcra Hakimiyyəti Mənzil Kommunal Təsərrüfatı İstehsalat Birliyindən verilən məlumata görə, bu gün gecə saatlarında naməlum şəxs və ya şəxslər tərəfindən parkın ərazisində yerləşən və 44 Günlük Vətən Müharibəsinin şəhidlərinin əziz xatirəsinə ucaldılmış heykəlin mərmər üzlüyün bir neçə hissələri qırılaraq zədələnib.
Habelə İstiqlal parkında şəhidlərimizin ruhuna hörmətsizlik edənlər, istirahət məkanında heykəli və ərazidə mövcud olan şəhid şəkillərinin işıqlandırılması üçün nəzərdə tutulan sistemə də ziyan vurublar. Bir neçə plafon qırılıb, bir işıqlandırma sistemi isə oğurlanıb.
Hazırda ərazidə Gəncə şəhər MKTİB-nin müvafiq şöbələri tərəfindən parkın ərazisində baş vermiş xoşagəlməz hadisənin aradan qaldırılması istiqamətində təmir və bərpa işlərinə start verilib.
“Ümid edirik ki, İstiqlal parkının infrastrukturuna və ərazidə şəhidlərimizin əziz xatirəsinə ucaldılmış abidəyə qarşı hörmətsizlik edən şəxs və ya şəxslər tezliklə hüquq mühafizə orqanları tərəfindən aşkar olunaraq cəzalandırılacaqlar” - qurumdan bildirilib.
