Gəncədə yeni stadion tikiləcək. Bu haqda 28 sentyabr tarixində Bizim.media-ya istinadən məlumat veririk.
Bildirilir ki, Nizami yurdunun stadion problemi birdəfəlik həll olunacaq. Şəhərdə 16 min tamaşaçının yerləşəcəyi stadion tikiləcək. Artıq yaxın günlərdə inşaat işlərini aparacaq şirkət indiki stadionun söküntüsünə başlayacaq.
Tikintinin 2025-ci ilin birinci yarısında başa çatdırılması gözlənilir. Həmin müdddətdə isə "Kəpəz" ev oyunlarını başqa şəhərdə keçirəcək. Məlumata əsasən, yeni stadionun tikintisinə Gənclər və İdman Nazirliyi nəzarət edəcək.
Bir müddət öncə 2025-ci ildə ölkəmizdə təşkil olunacaq 3-cü MDB Oyunlarının Gəncəyə salınması barədə xəbər vermişdik. Stadionun tikintisinin, həmçinin bu yarışla bağlı olduğu bildirilir. Yarışların açılış mərasimi şəhər stadionunda baş tutmalıdır. Hazırkı arena isə tələblərə cavab vermir.
Qeyd edək ki, “Kəpəz”in ev oyunlarını keçirdiyi stadion ötən əsrin 60-cı illərində inşa olunub və istismar müddətini başa vurub. Stadionun tribunaları qəzalı vəziyyətdə olduğu üçün PFL yalnız 3 minə qədər azarkeşin matçlara buraxılmasına icazə verib.
