Bu gün Gəncəli şəhid Sahib Həsənovun doğum günüdür. Onun 22 yaşı olacaqdı.
Həsənov Sahib Azər oğlu 19 oktyabr 1999-cu ildə Gəncə şəhərində doğulmuşdur. 2017-ci ildə Gəncə şəhəri 7 nömrəli tam orta məktəbi bitirən Sahib əsgərliyə yollanmışdır. Vətənə borcunu verəndən sonra MAHHX HQ kimi xidmətə davam etmişdir.
27 sentyabr 2020-ci il tarixində Azərbaycan Ordusunun əsgəri olaraq Sahib Həsənov torpaqlarımızın azadlığı uğrunda vuruşmuşdur. O, Murovdağ zirvəsi və Kəlbəcər rayonu uğrunda gedən döyüşlərdə iştirak etmişdir.
17 oktyabr 2020-ci ildə Kəlbəcər rayonu istiqamətində şəhidlik zirvəsinə ucalan Sahib Gəncə Şəhidlər xiyabanında dəfn edilmişdir.
Azərbaycan Respublikasının Prezidenti İlham Əliyevin müvafiq sərəncamlarına əsasən, Həsənov Sahib Azər oğlu ölümündən sonra "Vətən uğrunda", "Kəlbəcərin azad olunmasına görə", "Hərbi xidmətlərə görə" medalları ilə təltif edilib.
Allah şəhidimizə rəhmət eləsin…
