Gəncə-Daşkəsən Regional Təhsil İdarəsinin təşkilatçılığı ilə 8 Noyabr – Zəfər Günü ilə əlaqədar “Zəfərin mübarək, Azərbaycan” adlı tədbir keçirilib.
Gencexeber.az-a bu barədə regional təhsil idarəsindən məlumat verilib.
Gəncə şəhər 29 nömrəli tam orta məktəbdə keçirilən tədbirdə Gəncə-Daşkəsən Regional Təhsil İdarəsinin müdiri Elçin Kərimov, müdir müavini Rövşən Kərimov, təhsil sektorlarının müdirləri, məktəbəqədər təhsil müəssisələrinin və ümumi təhsil müəssisələrinin direktorları, şəhid ailələrinin üzvləri, qazilər və müharibə veteranları iştirak ediblər.
Azərbaycanın Dövlət Himninin səsləndirilməsi ilə başlanan tədbirdə şəhidlərin əziz xatirəsi yad edilib. Bildirilib ki, 8 Noyabr - Zəfər Günü Azərbaycan tarixinin qızıl səhifəsi, Müzəffər Ali Baş Komandan, Prezident İlham Əliyevin rəhbərliyi altında şanlı Azərbaycan Ordusunun yazdığı qəhrəmanlıq dastanıdır.
Tədbir şagirdlərin “Zəfər Günü”nə həsr olunmuş ədəbi-bədii kompozisiyaları ilə davam edib.
