Gəncədə sahibsiz itlərlə bağlı tədbirlər baş tutub. Bu haqda 3 may tarixində ADAU-ya istinadən məlumat veririk.
Baytarlıq Elmi-Tədqiqat İnstitutu beynəlxalq əməkdaşlıq çərçivəsində bağlanmış müqaviləyə əsasən, Almaniya dövlətinin “Tierschutz Entwicklungshilife e.v” təşkilatı ilə Azərbaycanda sahibsiz heyvanların qısırlaşdırılması, quduzluq peyvəndinin və qulaq birkalarının vurulması ilə bağlı növbəti aksiya təşkil olunub. Prosesə Almaniya, İspaniya və Rusiyadan olan 8 veterinar həkim-cərrah və feldşer assistentləri qatılıblar.
Aksiya zamanı Azərbaycan Dövlət Aqrar Universitetində olan mütəxəssislər tərəfindən Baytarlıq təbabəti fakültəsinin professor-müəllim heyəti və tələbələri ilə birlikdə şəhər ərazisində olan sahibsiz heyvanların qısırlaşdırılması, quduzluq peyvəndinin və qulaq birkalarının vurulması prosesi aparılıb.
Heyvan sığınacağı olan “Yuva”dan 70-ə yaxın sahibsiz küçə heyvanları da bura gətirilərək aksiyaya cəlb ediliblər.
