Gəncədə yerləşən Qafqazın ən qədim və ən zəngin parkında geniş iməcilik aksiyası keçirilib. Bu haqda 9 may tarixində MKTİB-yə istinadən xəbər veririk.
Xan Bağında mövcud yaşıllıq zolağına aqrotexniki qulluq göstərilib. Həmçinin istirahət məkanında sağlam iqlimin qorunub saxlanılması istiqamətində bir sıra işlər görülüb. MKTİB-nin xüsusi texnikaları və canlı qüvvəsi tərəfindən parkın döşəmələri, oturacaqları, fəvvarələri, gül qabları yuyulub, ömrünü başa vurmuş çiçək və gül kolları yeniləri ilə əvəz edilib.
Parkda yerləşən Yaşıl Teatrın ərazisi və oturacaqları yuyularaq təmizlənib. Bundan başqa, parkın ərazisində mövcud olan Xalq şairi Nigar Rəfibəylinin heykəlinin və ilk azərbaycanlı Sovet İttifaqı Qəhrəmanı İsrafil Məmmədovun qəbirüstü abidəsinin ətrafında təmizlik işləri aparılıb.
Qeyd edək ki, 6.5 hektarlıq ərazini əhatə edən və şəhərin havasının saf qalmasında, yay mövsümündə insanları qızmar günəşdən, qışda isə soyuq hava kütlələrindən qorumasında müstəsna rol oynayan Xan Bağı gəncəlilərin, eləcə də şəhərimizin qonaqlarının ən sevimli istirahət məkanlarından biridir.
