Gəncədəki məşhur arxlardan biri sakinlər üçün çətinlik yaradıb. Bu haqda 15 may tarixində Kəpəz televiziyasına istinadən məlumat veririk.
Söhbət Xan arxından gedir. Suvarma məqsədli kanal məişət tullantıları ilə çirkləndirilir. Ərazidə yaşayan sakinlər bildirirlər ki, arxa həm sıravi vətəndaşlar, həm də iaşə obyektləri zibil atırlar. Bu da antisanitariya vəziyyətinin və xoşagəlməz görüntünün yaranmasına səbəb olur. Bundan başqa, kanala kanalizasiya sularının axıdıldığı da iddia edilir.
Arxın sözügedən vəziyyətdə olması ilə bağlı Göygöl Suvarma Sistemləri İdarəsinin mühəndisi danışıb. O bildirib ki, kanal hər həftənin 1 və 2-ci günləri təmizlənir.
“Səbəb budur ki, vətəndaşlar və Xan arxının üzərində olan obyektlər, yəni restoranlar bütün məişət tullantılarını buraya atırlar. Biz neçə dəfə xəbərdarlıq etmişik, bildirmişik ki, arxı zibilləmək olmaz. Buna baxmayaraq, eyni vəziyyət davam edir. Ən çox plastik qablardır. Ümumiyyətlə, bütün məişət tullantılarını kanallarımıza atırlar. Misal üçün, bu yolun altında boru var. Su boru vasitəsilə keçirir. Əgər o tutulsa, su dolub daşacaq və çətin bir vəziyyət yarana bilər, - deyə mühəndis qeyd edib.
