DOST TV "Doğru bilinən yanlışlar" rubrikasında ailə başçısını itirməyə görə pensiya haqqında yanlış bilinən məlumatların doğrusunu açıqlayıb.
Çoxları elə bilir ki, vəfat edən şəxsin pensiyasını yalnız onun xanımı ala bilər.
Əslində isə ailə başçısını itirməyə görə pensiya vəfat edənin və ya onun həyat yoldaşının kişi və ya qadın olmasından asılı olmayaraq pensiya yaşını tamamlamış, yaxud bir və ya ikinci dərəcə əlilliyi olan həyat yoldaşına təyin olunur.
Həmçinin vəfat edənin 18 yaşına çatmamış övladlarının, əyani təhsil alan 23 yaşınadək övladlarının, 18 yaşına çatanadək əlilliyi müəyyən olunmuş, 18 yaşından yuxarı əlilliyi olan övladlarının, pensiya yaşına çatmış, yaxud birinci və ya ikinci dərəcə əlilliyi olan valideynlərinin də bu pensiyanı almaq hüququ var. Yaşından və əmək qabiliyyətindən asılı olmayaraq vəfat edənin səkkiz yaşınadək övladına qulluq etdiyi üçün işləməyən həyat yoldaşına, valideynlərindən birinə bacı və ya qardaşına, nənə və ya babasına da ailə başçısını itirməyə görə pensiya təyin olunur.
Ögey valideyn ögey övladını azı beş il tərbiyə edib və ya saxlayıbsa doğma valideynlərlə eyni səviyyədə bu pensiyanı almaq hüququna malikdir. Həmçinin ögey övladın, doğma övladlarla eyni səviyyədə ailə başçısını itirməyə görə pensiya hüququ var. Eləcə də övladlığa uşaq götürənlərin doğma valideynlərlə, övladlığa götürülənlərin isə doğma uşaqlarla eyni səviyyədə bu pensiyanı almaq hüququ var.
