Bu gün "Vətən uğrunda" medalı ilə təltif olunan Gəncəli şəhid Şəfiyev Rəşad Vaqif oğlunun doğum günüdür. Gencexeber.az olaraq onun adına inşa edilən ehsan bulağı haqda xəbər vermişdik.
Azərbaycanın Fövqəladə Hallar Nazirliyinin əsgəri olan Rəşad Şəfiyev 2020-ci il sentyabrın 27-də Vətən müharibəsi zamanı axtarış-xilasetmə əməliyyatlarında iştirak etmişdir.
Keçən ilin 4, 5, 8, 11 və 17 oktyabr tarixlərində Gəncənin, 27-də isə Bərdənin raket atəşinə tutulmasından sonra axtarış-xilasetmə əməliyyatlarına iştirak edib.
Rəşad Şəfiyev 28 oktyabr 2020-ci il tarixində Bərdənin növbəti dəfə raket atəşinə tutulması nəticəsində aldığı yaralardan şəhidlik zirvəsinə ucalıb. Gəncə Şəhidlər Xiyabanında dəfn olunan şəhidin vətənə əmanət iki övladı yadigar qalıb.
MAHHXHQ əsgər Şəfiyev Rəşad Vaqif oğlu 13 oktyabr 1991-ci ildə Gəncə şəhərində anadan olmuşdur. 1997-2010-cu illərdə Molla Pənah Vaqif adına 8 nömrəli orta məktəbdə təhsil alıb.
Qeyd edək ki, Prezident İlham Əliyevin müvafiq sərəncamına əsasən, Rəşad Şəfiyev ölümündən sonra "Vətən uğrunda" medalı ilə təltif edilib.
