Gəncə şəhər Mərkəzləşdirilmiş Kitabxana Sisteminin Uşaq şöbəsi tədbir təşkil edib. Bu haqda 12 iyun tarixində Mərkəzləşdirilmiş Kitabxana Sisteminə istinadən xəbər veririk.
12 iyun - Uşaq Əməyinə qarşı Mübarizə Günü ilə əlaqədar “Uşaqları məcburi əməyə yox, təhsilə cəlb edək” başlığı altında söhbət baş tutub. Burada bildirilib ki, hər bir xalqın, dövlətin ən böyük və qiymətli sərvəti uşaqlardır. Uşağı sağlam, cəmiyyətə faydalı vətəndaş kimi böyütmək çətin və məsuliyyətlidir. Uşaqlar fiziki və psixoloji cəhətdən müdafiəsiz və zəif olduqlarından onların xüsusi qayğı və münasibətə ehtiyacı var.
Tədbirdə, həmçinin deyilib ki, bu gün dünyanın bir çox yerlərində uşaq əməyindən istifadə olunaraq, onlar məcburi əməyə cəlb olunurlar. Uşaq əməyinin istismarı isə uşaqların təhsildən yayınması, onların fiziki və mənəvi inkişafına mənfi təsir edir. Nəticədə əməyi istismar edilən uşaq gələcək arzu və istəklərindən məhrum olur.
