Gəncədə "19 May - Atatürkü Anma, Gənclik və İdman Bayramı" münasibətilə tədbir keçirilib. Bu haqda 21 may tarixində İcra Hakimiyyətinə istinadən xəbər veririk.
Tədbirdə Türkiyənin Baş konsulu Recep Öztop, İcra Hakimiyyəti başçısı Aparatının Şəhərin mədəni irsinin qorunması şöbəsinin müdiri Yadigar Bədəlov və ADAU-nun Tədris işləri üzrə prorektoru Əhməd Məlikov iştirak ediblər. Onlar bildiriblər ki, Mustafa Kamal Atatürkün Samsuna çatma tarixi olan 19 may onun öz istəyi ilə hər il Gənclik və İdman bayramı kimi qeyd edilir. Bayrama “Atatürkü Anma” əlavəsi isə 1981-ci ildə olunub və həmin vaxtdan bu günədək hər il rəsmi qaydada 19 may Atatürkü Anma, Gənclik və İdman Bayramı kimi keçirilir.
Daha sonra mövzu ilə əlaqədar videoçarxlar da nümayiş olunub. Həmçinin tədbirə həsr olunan basketbol yarışı keçirilib və qalib komandalar mükafatlandırılıb.
