Gəncə şəhəri dünyada iqlim dəyişlikliyi ilə mübarizə aparan ən böyük qlobal şəbəkəyə qoşulub. Bu haqda 23 may tarixində MKTİB-yə istinadən xəbər veririk.
Sözügedən şəbəkə “Qlobal Merlər Razılaşması” adlanır. Burada dünya üzrə 13 mindən çox şəhər təmsil olunur və Gəncə də onların sırasındadır. Qədim Nizami yurdu qarşısına çox iddialı bir hədəf qoyub. Bu, 2030-cu ilə qədər istixana qazlarının emissiyalarını 30 faiz azaltmaqdan ibarətdir. Ona görə müvafiq tədbirlər planlaşdırılır. Dayanıqlı enerji üzrə fəaliyyət planı artıq hazırdır. Bu, şəhər səviyyəsində təsdiqlənməlidir və sonra onun icrasına başlanılacaq. Bu fikirlər “Dayanıqlı Enerji və İqlim üzrə Fəaliyyət Planı” ilə əlaqədar həyata keçirilən müzakirələrdə səsləndirilib.
Azərbaycan Respublikası Energetika Nazirliyi, İcra Hakimiyyəti, YAP Şəhər Təşkilatı, MKTİB və onun yaşıllaşdırma şöbəsi, AMEA Gəncə Bölməsi, Regional Ekologiya və Təbii Sərvətlər İdarəsi və ümumlikdə 16 dövlət qurumunun qatıldığı tədbirdə Gəncədə kənar təsirlərin yumşaldılması məsələlərinə toxunulub, müxtəlif istixana qazlarının azaldılması, enerji səmərəliliyinin artırılmasına diqqət çəkilib. Eyni zamanda iqlim dəyişilməsinə uyğunlaşma tədbirləri barədə danışılıb.
Bu proqramın şəhərimiz üçün önəmi ondan ibarətdir ki, gələcəkdə müvafiq tədbirlərin icra edilməsi ilə enerji səmərəliliyinə nail oluna bilər. Bu isə şəhərdəki yaşayış və inzibati binaların enerji təminatının dayanıqlığını təmin etmiş olacaq. 2021-ci ildə Azərbaycan Respublikası Prezidenti tərəfindən təsdiq edilmiş milli prioritetlər sırasında “Təmiz ətraf mühit və yaşıl artım ölkəsi” də yer alıb. Eyni zamanda 2021-ci ildə ölkəmiz tərəfindən könüllü öhdəlik olaraq, istixana qazları emissiyalarının 1990-cı il ilə müqayisədə 2050-ci ilə qədər 40% azaldılması elan edilib. Tədbirin sonunda iştirakçılara təşəkkürnamə sertifikatları verilib.
