Gəncədə “Yaşıl dünya naminə həmrəylik ili” çərçivəsində tədbir olub. Bu haqda 12 iyun tarixində Üzümçülük və Şərabçılıq Elmi-Tədqiqat İnstitutuna istinadən xəbər veririk.
Üzümçülük və Şərabçılıq Elmi-Tədqiqat İnstitutu Təcrübə Stansiyasında tədbir təşkil edib. Burada yerli süfrə və texniki üzüm sortlarından ibarət üzüm bağlarında yaşıl əməliyyatlar, xəstəlik və zərərvericilərə qarşı mübarizə, torpaq becərmələri həyata keçirilib. Həmçinin dibçəklərdə xüsusi şəraitdə yetişdirilən yerli üzüm sortlarından yeni üzüm bağı salınıb, seyrəkliklər aradan qaldırılıb.
Qeyd etmək lazımdır ki, üzümün kök sistemi güclü inkişaf edərək quraqlığa davamlılıq qazanmaqla torpaq eroziyasının qarşısını alır. Bununla yanaşı, mədəni üzüm bitkisinin uzunömürlülüyünün təmin edilməsi məqsədilə bir çox aqrotexniki, aqrokimyəvi və bitki mühafizəsi tədbirlərinin aparılması vacibdir.
