Gəncədən təxminən 10 kilometr məsafədə yerləşən kənd susuzluqdan əziyyət çəkir.
Gencexeber.az-a sözügedən məsələ ilə bağlı Goranboy rayonu Nizami kəndinin sakinləri bildiriblər ki, yaşayış məntəqəsində mövcud 70 yaşayış evini su ilə təmin edən bircə artezian var. Şikayətçilər deyirlər ki, təzyiqli yeraltı suların çıxarılması üçün nəzərdə tutulan bu qurğu tələbatı ödəmir.
Bu səbəbdən ərazidə mövcud yaşıllıqlar quruyur, təsərrüfatlar məhv olur. Vətəndaşlar dəfələrlə aidiyyəti üzrə müraciət etsələr də, müsbətə doğru heç bir dəyişikliyə nail ola bilməyiblər.
Kəndlilər yay aylarında suyun tamamilə kəsilməsini proqnozlaşdıraraq ərazidən məcburiyyət qarşısında köçəcəklərini də söyləyiblər: “İndi su yoxdursa, yayda necə olacaq? Belə getsə, köçməliyik buradan”.
Onlar kəndin su ilə təmin edilməsi məqsədilə təxirəsalınmaz tədbirlərin görülməsini tələb edirlər.
