Gəncə Şəhər Birləşmiş Xəstəxanasının nümayəndəsi XV Azərbaycan-Türkiyə-Almaniya Tibb Hüququ Simpoziumunda olub. Bu haqda 11 iyun tarixində Gəncə Şəhər Birləşmiş Xəstəxanasına istinadən xəbər veririk.
“XXI əsrdə tibb hüququ və insan hüquqlarının müdafiəsi“ adlı beynəlxalq elmi-praktik XV Azərbaycan-Türkiyə-Almaniya Tibb Hüququ Simpoziumu keçirilib. Burada ŞBX-nin hüquqşünası Hadı Hüseynov iştirak edib. Tədbir Türkiyə Tibb Hüququ İnstitutu və Almaniya Martin Luther Universitetinin birgə təşəbbüsü, “İnjuria” jurnalı Hüquq və İnsan Haqları İnstitutunun təşkilati dəstəyi ilə baş tutub.
Bakıda keçirilən simpoziumda dünyada və ölkəmizdə yeni biotexnoloji və biotibbi fəaliyyətin həyata keçirilməsi və tədqiqatların aparılması zamanı hüquqi tənzimləmə metodlarının öyrənilməsi barədə danışılıb. Həmçinin Avropa məhkəmə praktikasının, səhiyyədə insan hüquqlarının və azadlıqlarının müdafiəsi sahəsində görülən işlərə tibb və hüquq elminin birgə yanaşmasının və fərqli baxışlarının müzakirəsi edilib.
