Gəncədə “Zəfər” respublika yaradıcılıq festival-müsabiqəsinin zona mərhələsi keçirilib. Bu haqda 21 may tarixində Regional Təhsil İdarəsinə istinadən xəbər veririk.
Festival-müsabiqənin keçirilməsində məqsəd milli mədəniyyətin və incəsənətin təbliği, uşaqların milli vətənpərvərlik, mədəniyyətə, incəsənətə, milli adət-ənənələrə hörmət ruhunda tərbiyə edilməsi, onlarda mədəni həyat tərzinin formalaşdırılması işinə köməklik göstərilməsi, Vətən müharibəsində şəhid olmuş qəhrəmanlarımızın əziz xatirəsinin ehtitamla yad edilməsidir. Həmçinin ölkəmizin işğal altında olan ərazilərinin azad edilməsində ordumuzun və dövlətimizin əldə etdiyi nailiyyətlərin, qazanılan zəfərin bütün türk dünyasının qələbəsi olduğunu gənc nəslə çatdırmaqdır.
Üç yaş qrupu və nominasiyaları üzrə keçirilən festival-müsabiqənin qalibləri mükafatlandırılacaqlar. Yekun tədbir oktyabr ayında Bakı şəhərində təşkil olunacaq.
